Steinunn Jóhannesdóttir segir sögu Hallgríms og Guðríðar

01. apríl. 2015 01:33

Steinunn Jóhannesdóttir segir sögu Hallgríms og Guðríðar

Um bænadagana verður athyglinni beint að Hallgrími Péturssyni og Guðríði Símonardóttur í Borgarnesi. Steinunn Jóhannesdóttir rithöfundur mun þá rekja æviferil skáldsins og konu hans í frá örlagaárinu 1627, Tyrkjaránsárinu, og til æviloka beggja. Viðburðurinn er í Landnámssetrinu í Borgarnesi. Frumsýnt verður á morgun, skírdagskvöld, klukkan 20.

 

Staldrað verður við mikilvægustu atriði í þroskaferli skáldsins, tengsl þeirra hjóna við háa sem lága á 17. öld, ástir þeirra og átök við yfirvöld, fátækt sem velsæld, börn þeirra og barnamissi, skáldfrægð, sjúkdóm og dauða.

 

Steinunn Jóhannesdóttir hefur um langt árabil fengist við ævi þessara einstæðu persóna sem sett hafa svo sterkan svip á sögu Íslendinga á 17. öld, Hallgrímur sem eitt af mestu skáldum þjóðarinnar, Guðríður sem konan sem komst af frá Tyrkjaráninu, sterkari, víðförulli, lífsreyndari og lífsseigari en flestar konur á hennar tíð. Fyrsta verk Steinunnar um þessar persónur var leikritið Heimur Guðríðar, síðasta heimsókn Guðríðar Símonardóttur í kirkju Hallgríms sem sýnt var í kirkjum víða um land (1995-2000). Árið 2001 kom út Reisubók Guðríðar Símonardóttur; skáldsaga byggð á heimildum. 2010 kom út Heimanfylgja; skáldsaga um uppvöxt Hallgríms Péturssonar byggð á heimildum um ættfólk hans og samtíð. Og 2014 kom út barnabókin Jólin hans Hallgríms. Auk þessa hefur Steinunn haldið fjölda fyrirlestra og birt greinar í tímaritum um rannsóknarefni sitt.

 

Á föstudaginn langa verða Passíusálmar Hallgríms Péturssonar síðan fluttir í heild sinni í Borgarneskirkju í umsjón Steinunnar. Lesarar verða alls tíu, flestir Borgnesingar. Tónlistarfólk úr héraði flytur tónlist milli þátta.  Flutningur Passíusálmanna föstudaginn 3. apríl hefst klukkan 13:30.